Со громогласен аплауз и на нозе беше поздравен еден од омилените актери и комичари во регионот Драган Маринковиќ Маца, кој настапи на 5-та театарска фестивалска вечер, со претставата „Каква ти е сопругата – таков си и ти“, во продукција на „Златен заб“.
Публиката во салата на НУ Центар за култура беше воодушевена од оригиналната актерска игра на познатиот и харизматичен Маца, се смееше на неговите шеговити реплики за вечната тема за бракот и машко-женските односи, но поттикна и размислување за смислата на животот.
Маца поентираше со пораката дека годините не смеат да се потрошат залудно, за да немаш со кого да се вратиш назад или со кого да продолжиш напред, нагласувајќи дека во животот не постои ништо важно, освен љубовта.
Тој ја поздрави кривопаланечката публика и изрази големо задоволство од гостувањето на театарскиот фестивал и престојот во Крива Паланка.
„Првпат сум во Крива Паланка, знам дека сте Град на културата, а со години слушам дека овде гостуваат многу мои колеги- актери, музички ѕвезди и уметници и постојано се прашував: „Боже колкава е таа Крива Паланка?“ Целосен респект што ја сакате уметноста и што уживате во неа. Ви посакувам уште многу фестивали“, порача Маринковиќ.
На шестата фестивалска вечер на МТФ„ Св. Јоаким Осоговски“ ( втори септември), настапува Народниот театар„Стерија“ од збратимениот Вршац, Србија, со претставата „Симпатија и антипатија“.
Претставата се игра во НУ Центар за култура, со почеток во 19,30 часот.
Билетите се продаваат од 12,00-19,30 ласот на билетарницата на НУ Центар за култура.
