Со поетско-музичката манифестација насловена како „Место каде минатото се сретнува со иднината“ Општина Крива Паланка го одбележи Денот на Европа, 9 Мај. Настанот се одржа на платото пред манастирот Свети Јоаким Осоговски и следуваше по дневните случувања на главниот градски плоштад организирани од Општината во соработка со ЕУ инфо центарот на Делегацијата на ЕУ во Скопје.
На манифестацијата на која присуствуваше и амбасадорот на ЕУ во Р.Македонија, Самел Жбогар, настапија бројни уметници од Крива Паланка и регионот.
Преку живиот збор на поетите, гудалото на виолината и виолончелото, жиците на гитарата, милозвучната песна на флејтата, грлото на расепеаните кривопаланчани, елегијата на етно и староградската песна и сето тоа вткаено во прекрасниот пејсажен амбиент на десетвековното духовно, културно-историско и градителско наследство на нашиот заштитник и патрон Свети Јоаким Осоговски се одбележа денот на европскиот идентитет и заложбата за заедништво на сите народи на стариот континент.
