Утревечер (12.04.2024), со почеток во 20,00 часот, во Градскиот музеј на Крива Паланка ќе биде отворена постхумна ретроспективна изложба на ликовниот уметник Лазо Крстевски (1951 – 2022).
На изложбата за првпат пред кривопаланечката јавност ќе бидат претставени дела на Крстевски, кој важи за еден од најзначајните ликовни педагози во Крива Паланка, а кој најголемиот дел од својот работен век го има посветено на работата со учениците, што резултирало со броjни благодарници, пофалници, дипломи и награди на многу ликовни конкурси во градот, како и на државно ниво.
Автор на изложбата е Ѓорги Костовски историчар на уметност, кој ќе истакне дека и покрај мноштвото крстосници и патишта низ разни стилови и правци на Крстевски, неговото творештво може да се подели во три главни циклуси: поетски реализам, експресионизам и лирска апстракција. Единствен мотив кој се повторува низ целото негово творештво е кривопаланечката староградската архитектура, особено старата градска чаршија.
Лазо Крстевски e роден 22.05.1951 година во Крива Паланка. Основното образование го завршува во својот роден град, по што се запишува во средното училиште за примената уметност во Скопје – отсек вајарство, кое го завршува во 1971 година. Подоцна завршува Виша Педагошка академија во Скопје, на групата ликовно воспитување, со што се стекнува со стручно звање наставник по ликовно воспитување и од 1983 година започнува неговата педагошка дејност на која и се посветува се до крајот на својот живот.
