Во Центарот за култура Крива Паланка деновиве се одржа јубилејното десетто, издание на Детскиот музички фестивал „Распеано симитче 2024“.
На фестивалот беа изведени 18 нови композиции, со модерен стил, создадени од локални и регионални автори, во прилог на афирмацијата на локалната музичка сцена и култура.
Детскиот фестивал „Распеано симитче“ низ годините успеа да изгради музичка култура за најмладите и возрасните во градот и регионот, промовирајќи локални автори на текстовите, музиката и аранжманот, етаблирајќи млади изведувачи и талентирани дечиња што ги интерпретираат песните, а тука се и членовите на хорот што го комплетираат целиот сценски настап.
И годинава публиката уживаше во вкупно 18 хитовски рефрени изведени од млади таленти од Крива Паланка, кои ќе продолжат да се пеат меѓу дечињата во секоја пригода за забава и нивна дружба.
Фестивалот се одржува под покровителство на Општина Крива Паланка, во ко-организација со Центарот за култура од Крива Паланка, а организатор на фестивалот е ГО „Центарот за аудиовизуелни уметности“ од Крива Паланка.